- બાઇક પરથી પટકાયા બાદ પતિની નજર સામે જ પત્નીનું મોત
- એકાએક સ્પીડબ્રેકર આવી જતા થયો અકસ્માત
હાલાર: જામનગરના પ્રદર્શન ગ્રાઉન્ડ નજીક બાઇક પરથી પટકાયા બાદ પતિની નજર સામે જ પત્નીનું મોત થયાનું સામે આવ્યું છે. એકાએક સ્પીડબ્રેકર આવી જતા અકસ્માત થયો હતો. જેમાં હેમરેજ સહિતની ઈજા થતા મહિલાનુ કમકમાટીભર્યું મોત નીપજ્યું છે.
જાણો શું છે આ સમગ્ર ઘટના:
જામનગર સીટી બી ડિવિઝન પોલીસ મથકેથી પ્રાપ્ત વિગત અનુસાર જામનગરના ગોકુલ નગર વિસ્તારમાં આવેલ દ્વારકાધીશ શેરી નંબર 4 માં રહેતા જયેશભાઈ દેવજીભાઈ ખાણધર અને તેમના પત્ની ચંદ્રિકાબેન જયેશભાઈ ખાણધર બને ગત તા. 14 તારીખના રોજ બાઈક લઇને જઈ રહ્યા હતા. આ વેળાએ જામનગરના એમ પી શાહ કોલેજની પાસે આવેલ પ્રદર્શન ગ્રાઉન્ડ પાસેથી પસાર થઈ રહ્યા હતા. ત્યારે માર્ગ પર એકાએક સ્પીડ બ્રેકર આવી ગયું હતું.
જેમાં પતિ જયેશભાઈ ખાણધરનું ધ્યાન ન રહેતા તેઓએ બાઈક પરથી નિયંત્રણ ગુમાવી દીધું હતું. આથી ચંદ્રિકાબેન જયેશભાઈ ખાણધર બાઈક પરથી પટકાયા હતા. જેમાં ચંદ્રિકાબેનને હેમરેજ સહિતની ઈજા થઈ હતી. આ ઈજા જીવલેણ સાબિત થતાં તેણીનું મોતની નીપજ્યું હતું.
આમ પતિની નજર સામે જ પત્નીનું મોત થતા સમગ્ર પરિવારમાં અરેરાટી મચી છે. જે મામલે સિટી બી ડિવિજન પોલીસે આગળની કાર્યવાહી હાથ ધરી છે.
